放胎後 day 10

今朝JA醒左...又不停掃Forum...第一次 不斷FEEL自己身體變化...
其實冇....連個胸都冇漲冇谷~~

已經同老公講打定輸數~老公叫我驗...但我真冇勇氣...亦唔想老公失望...
想起下年新年...自己已經好唔開心了...

老公是長子的孫...而且屋企思想好古老~~重男得好緊要...

自己肚皮唔爭氣...

記得我同細妹講過...我覺得我呢世都唔會做到MAMA...5年了...現在ivf 都幫唔到我??

bb 係咪我沒有準備好...所以你一直都不來我身邊??

放胎後 Day 9 繼而無感覺...

今天同朋友食Lunch 行街街...夜晚一起回家同老公食飯...一起睇左大陸綜藝節目
笑笑笑... 都忘記了自己完全冇感覺
都暫時忘記唔開心...其實內心深處都有在想~~
因為朋友知道我IVF...仲話6月1日等我好消息...

朋友是我最好的男仔朋友...他是GAY 而且很喜歡小朋友, 仲住我附近~
BB你未出世都已經有人說明會很喜歡你~~

希望可以見到傳說中的第二條線會出現啦~~

放胎後 day 8 冇感覺

今日老公仍然放假~ 但外面黑雨~所以在家大掃除....到夜晚老公好想食叉燒同燒肉...就出去帶埋隻狗行下~~

但今天又完全沒有感覺...好擔心~因為平時M前就會忽然所有谷M感都冇曬~ 連胸痛都冇...

BB今天感覺不到你...你還在嗎??哭...

不斷的在網上搜查有冇人沒有感覺都可以BINGO...
就黎癲啦~~~
又不停打乞嚏...

老爺打左比我...問我幾時開始IVF....因為之前老公同佢講左....比我罵死...
但我都講左大話~話未開始!! 因為唔想仍抱期望...唔想佢失望~~~自己亦唔想有無形壓力...

放胎後 day 7 渴望

老公放早回來, 夜晚唔洗返工, 下午去游水 (我冇游)只在CLUB HSE 睇雜誌, 之後去沙田IKEA 買左屋企野, 主要想買畫, 但睇唔岩~ 但係IKEA食左杯 YOGURT...可能太凍~ 個肚怨怨地...唔太舒服...好後悔食了凍野~~ 但又心裡暗喜~~可能是初期懷孕的反應!!
究竟是因為食凍野或是懷孕初的感覺?!?!

bb你還在嗎? 我知我不是幸運的一群......但都會渴望有一次的幸運...

放胎後 day 6 正式返工了

琴晚訓覺個胸勁痛~~今朝Lower back都有點兒痛~~唔知m小姐係咪就到啦~~
真係有feel 又驚 冇feel又驚呀!!

今日返工雖然短途~但都有提重野~~
又唔知點解nose敏感...勁打噴嚏....

好擔心呀!!

今晚回家又有老公燉的花膠湯,材料:海參,阿膠,瑤柱, 當心, 豬展

真的唔想令老公失望...佢好鐘小朋友... 仲有老爺....久等了...
bb 希望你還在嗎?? 求你堅強堅持地留在mama肚裹~~~

放胎後 day 5 mami終於旅行回來了

BABA MAMI 一早就黎搵我飲茶, 老公返夜 要訓覺冇JOIN我地~~

爸媽帶好多補品食品比我~~
夜晚仲煮左好多我唔食得的正野食,,,,哈哈
因為海鮮 我真的唔敢博呀~~只有留口水~~~
但為左BB 我可以!!!

永遠都是有爸媽的孩子像個寶呀!!! LOVE YOU baba & mami

希望肚褢的你都感受到公公,婆婆的愛:)
加油痴住媽媽到這世界!!

放胎後 day 4 失眠

今日終於出街啦 同堂姐食birthday brunch!!🎂有放監的感覺 因為太耐4日冇出過門!!!(其實好小…哈哈)
大概6點就返到屋企。即刻塞藥 躺床。
但個胸好似脹脹地 個感覺不太舒服……

擔心 係咪出街時 跑咗幾步追小巴!? (一時唔記得!!)

晚飯都冇咩胃口……
今晚有老公燉嘅 花膠海參豬展湯 (加咗紅棗)

第二朝0625 機……但我10點上床 一路唸聽日day 5可能著床，上到機啲overhead locker好重 (1個7kg,3個21kg) 唔洗你搬 淨係要你close曬都死……，如果有wheelchair pax要扶佢 幫佢放袋……set餐車、收野要mou底起身……餐車上面個drawer放滿drinks 要搬去cart top (未必次次有同事幫)…………

再望鐘2am...仲有2個半要起身
好掙扎 好混亂 唔知port唔port好……因為公司大地震 人心惶惶……我2，3，4月都真病port jor…
打咗比老公 同事(唯一知我ivf的同事),
最後port jor....

8點起身下面勁多分泌，連藥都有留出小小
究竟bb還在嗎!? 怕藥吸收唔到 唔夠黃體素…
2ww 真的是令人擔心呀!!
Bb希望你痴到實!! 🙏🙏真的好多人期待你出現呀!!!

媽媽同事話公司因為咁而炒我 佢養我 (佢想我安心port sick 好好在家休息，佢知我和老公 期待bb已久…) 就是喜歡和gay佬做friend 又體貼 又幽默 love you sis!!! 在心中!!!

放胎後 day 3 冇感覺...

今日爸爸又黎左我屋企!!
帶左提子 (屋企其實有好多水果, 但原來我係唔食得), 點心, 瑞士蛋糕,
海參, 豬展, 菜心
實在太正啦!!!

今日好似都冇咩感覺... BB你要努力呀!!! 你爸爸 媽咪 公公 婆婆 都等左你好耐啦!!
希望你可以黎到呢個世界!!
2 week wait (2ww) 之前睇BLOG,好多IVF MAMA都話2WW 係最辛苦最難渡過...
果然浪不虛名呀!!

今日都有繼續空肚食菠蘿...黑朱古力...烚雞蛋...花膠湯'

同爸爸出去放狗行下, 買左半隻口水雞 就返屋企準備晚飯啦~~
老公今日返夜...成個晏晝都訓覺~~好在爸爸黎左,陪下我!!

放胎後 day 2 小口福

今日起身照空肚食菠蘿芯(用熱水浸)，食咗兩隻烚蛋，夜晚都有飲花膠湯。

但今日完全冇感覺……究竟bb仲喺唔喺度?:(
好擔心……
之前塞藥都冇流出黎，但今日又有好多分泌，好似留番啲塞藥出黎……唔知有冇吸收到

爸爸今日工作有變數 黎唔到，
但都有老公愛心燉湯，
材料有: 花膠，豬展，螺頭，母魷魚乾，紅棗 (4，5粒)，蜜棗(半粒)

覺得自己有點兒口福，因為老公好愛煮食，煮飯，燉湯都難唔到佢!!
有個小秘密:其實個燉盅，我到而家都未用過…… 
呢段時間 老公嘅精神支持很重要呀！多謝老公

放胎後 day 1 感動

本身今日約咗爸爸回娘家飲茶，因為媽咪去咗旅行，但放胎後唔想舟車勞頓，唯有同爸爸講我做了小手術……可能媽咪透露過我做ivf baba都冇問任何野，只是說搭車入黎搵我(車程來回都2粒鐘) 買了龍躉煮米線比我食，燉豬展煲花膠湯，仲幫我預備埋晚餐……仲有雞精，燕窩
世上真的只有父母永遠愛錫女兒
Baba 一回到家 就問我明天想食咩 再入黎找我
真的要好好孝順他們永遠會照顧你們到老!!!

今日好像已經冇咩感覺……但有水狀分泌~~怕藥都一起流出 沒吸收到……

早上堅持空肚食菠蘿芯，85%黑朱古力，希望bb有繼續分裂 繼續痴住我

今日已放胎!!:)

今朝屋企5點半起身 塞咗藥，老公陪我出發瑪麗💪未到已經勁飲水，因為姑娘話要急尿先會睇得清楚啲!!
準備入去前太急痾咗少少，喺廁所聽到叫我名，即刻急停，姑娘一照話 呢個係膀胱 下面係子宮,仲話你應該好急尿喎!! 個過程大概15分鐘 姑娘一路喺肚照超聲波 話我聽過程，完成仲 預祝我成功!!!

其實瑪麗公家 姑娘醫生都好好，係有時超多人 燥少少 其實都正常呀🙏

最後希望bb用力點痴緊我!! 一切順順利利🙏🙏

今日有食菠蘿芯，85%黑朱古力，仲有老公燉既花膠鮮奶 (加咗阿膠)

準備放胎 day 18

今日係母親節 老公都祝我母親節快樂😄傻傻地……但我希望下年我可以以mami身份慶祝啦😆
返埋聽日工 就放胎!!!好緊張!!!

今日返工塞藥真係有啲難道，飲淡水時間都冇……最後都係放工先塞到……好彩收早😄

準備放胎-day 17

又過一關，驗血報告ok!!!
今日開始除咗每日食3粒藍丸仔，再要每日塞塞3次小白球……姑娘話 如果成功懷孕，要塞到3個月!!

其實真的對ivf mama 致敬🙋🙏

不過最辛苦的早起回瑪麗打針時期已過了……估唔到我咁大頭蝦 暫時都未試過忘記食藥，要為自己打氣💪fighting💪💪

準備放胎-day16 照lining

其實ivf 過程真係好似打機咁 一關過完到一關，今日陰超lining 8.4mm 醫生話適合放胎! 但之後要驗血，等回覆先知道適唔適合放胎!!
暫定16號放胎!!
而家又有一個問題啦，放1個定2個……
不過都係等埋驗血結果先，好緊張呀！

準備放胎-開始食藥 day16

今日返醫院照陰超，準備放胎，希望一齊順利 可以放胎啦~~失眠了 一陣仲要0730到瑪麗，唔洗訓啦😐

準備放胎-開始食藥 day6

仲有8日返去陰超... 先知可唔可以放胎~~
真係一關又一關呀!!
希望今個月可以放啦~~
唔想同Training撞期~

今日仍然有好像排卵的分泌~ 唔知係唔係正常~~

原來獨立真係有個過渡期...
由於身邊所有朋友都已組織家庭,有小朋友,不像以前那麼容易, 三五成群的飯局或者活動~

頭3個月和老公搬家後, 只要老公返工都覺得自己好孤獨...好悶...除了返工 就已經沒有方向了...
但現在我不會用孤獨來形容, 我覺得是更獨立,更懂得管理家中的大小事務,
做一個更稱職的人妻,為做一個更稱職的媽媽做好準備!!:)

因為以前同爸媽住真的太幸福了!! 只要做好自己工作,家裡的大小事務都不用我操心~~
豐富又營養的三餐...家裡的大小家務...連上班制服都已經熨到起骨...
回到家就像小公主~~
相信很多人都和我一樣的幸福~~什麼家務..家裡事務...都一桶半水....

但經過8個月和老公的二人世界生活~~~現在已算合格的人妻了 Hee Hee
爸媽一個月來探訪至少兩次~ 每一次評價都愈來愈高!
還稱讚我們兩個都要上班還有一隻小狗~真的是已經很打理得好好~~
(以前小狗都有爸媽幫忙照顧~~而家一手一腳照顧...先知道真的不容易...小狗也需要過渡期~
現在可說是磨合到了~雖然有時還是俾佢激到扎扎跳~~~)

不過小狗令我們更有耐性~更有責任感~~ 真的是訓練我們做父母的好練習~~
雖然初生嬰兒一定更加更加更加的挑戰 (重要的事情要講三次)
但以我這雞手鴨腳 連自己都未照顧得好的人妻...
如果越級挑戰...一定會產前,後抑鬱...

現在可說是有小許信心能做媽媽...
雖然知道是一件很身心勞累的事 但相信和老公有共識的一起承擔這責任,
一定可以是稱職的爸媽 !!

現在就期待上天在適當時給我們這份無價寶吧!!

準備放胎-開始食藥 day4

今朝準時11am食藥，初時仲驚自己會唔記得食藥，原來有上心既事 自己係會咁好記性!!
今朝亦都同姑娘對咗電話，day 16先返去照ultrasound 睇下lining夠唔夠厚係正常的 因為係人工週期。
初初擔心咁遲照 lining會太厚……而家會一路乖乖食藥到12號!! fighting💪💪為自己打打氣!!!